Поранешната специјална јавна обвинителка Катица Јанева доби дозвола од Управата за извршување санкции да излегува од затворот „Идризово“ за да работи во фирма. Таа од пред една недела работи во адвокатската канцеларија на нејзиниот син, Лазар Јанев.
Оваа информација денеска ја откри самата Јанева, споделувајќи ја на својот профил на социјалната мрежа Фејсбук.
Јанева беше уапсена како осомничена во „Рекет“ на 21 август 2019 година, по што беше во притвор, а по досудената затворската казна од седум години беше преместена во „Идризово“, а ваквата привилегија Јанева ја добива откако одлежа речиси пет години затвор.
Во изјава за МКД.мк директорот на Управата за извршување на санкции, Јовица Стојановиќ рече дека на Јанева ѝ е издадено решени да може да оди на работа, а штом ќе заврши работното време, таа се враќа во затворот.
-Платата оди на сметка на затворот. Решението ќе важи се додека таа и навистина оди на работа и ги почитува условите од решението, односно ќе се прават строги контроли во таа смисла, изјави Стојановиќ.
Директорот додаде дека за да се добие привилегијата казната за доиздржување не треба да е поголема од 3 години. Јанева е една од околу 100 осудени лица кои излегуваат дневно од затворите со ваков третман.
Извор: skopskoeho.mk
