Ќе ги одмерат ли силите Венко Филипче и Максим Димитриевски на локалните избори и во општина центар откако ЗНАМ денеска посочија дека не ја исклучуваат можноста да номинираат свој кандидат поддржан и од ВМРО-ДПМНЕ, а СДСМ веќе информираа дека и овој мандат ќе го трчаат со Горан Герасимовски.
Со оглед на тоа дека ВМРО-ДПМНЕ пак и во досегашните објави на кандидати се уште не објавила за Центар импутира на тоа дека голема е веројатноста дека доколку ЗНАМ излезат со нивни кандидат истиот ќе биде поддржан и од најголемата партија во власта. Сепак од ЗНАМ посочија дека во општините каде ќе кандидираат градоначалници очекуваат поддршка и од коалицискиот владин партнер и дека токму општина Центар е една од скопските општини која е во игра да трчаат со свој предлог.
Вчера пак лидерот на СДСМ Венко Филипче излезе со нова листа на имиња за 19 кандидати за градоначалници но таму не се најде името на актуелниот градоначалник на Струмица Костадин Костадинов. Сепак од партијата и денеска велат дека ова се само дел од имињата и дека се уште траат внатрепартиските анализи и анкети и дека Костадинов се уште е во игра.
Актуелниот градоначалник на Струмица Костадин Костадинов пак веќе се огласи дека ова е листа со само 19 кандидати и дека чека да завршат внатрепартиските процедури и дека очекува да се најде неговото име на некоја од следните листи со оглед на тоа дека како што вели на сите анкети бил во водство.
– Очекувам по завршување на внатрепартиските процедури да се обзнани одлуката на раководството дека ќе бидам кандидат за градоначалник на Струмица од СДСМ Согласно анкетите кои ги има во јавноста граѓаните јасно се изјаснуваат за моја поддршка со однос 3:1 што значи убедлива предност па и победа уште во првиот круг. Јас сум член на СДСМ имам достоинство и обврска да ја почитувам динамиката и стратешката поставеност на раководството но и лидерот Венко Филипче. – Костадин Костадинов.
Владејачката ВМРО-ДПМНЕ до сега излезе со над 30 имиња за кандидати за градоначалници меѓу поголемите општини веќе познати се Битола, Штип, Охрид, Аеродром, Кавадарци. Сепак за Скопје се уште нема официјално номинирано име иако се поизвесно е дека трката ќе се води меѓу Златко Перински, Орце Ѓоргиевски и Коце Трајановски кој исто така добро котира на внатрепартиските листи.
Кај албанскиот политички блок истот ака веќе се привршува со вантрепартиските анкети, а Влен веќе излегоа со најголем дел од имињата. Од попознатите веќе е јасно дека Билал Касами повторно ќе трча за Тетово, и Висар Ганиу за Чаир.
Европскиот фронт кој се очекува да стане Национален фронт откако се погласни се информациите дека деновиве со потпис и на Таравари ќе го прошират опозицискиот блок, веќе се лицитира со одредени имиња, така што како можен кандидат за Чаир се спомнува дури и Бујар Османи, за Сарај Блерант Рамадани кој доаѓа од крилото на Таравари а пак за во Тетово се спомнуваат имињата на Бајрам Реџепи и Фатон Ахмети од ДУИ, но и Илир Демири од Алијансата за Албанците – крило на Села.
Извор: 24vesti.mk
