ХАТАЈ (АА) – Министерот за здравство на Република Туркије, Фахретин Коџа, соопшти дека бројот на загинати како последица на разорните земјотреси на југот на земјата е зголемен на 20.213, а бројот на повредени на 80.052, јавува Анадолу.
Два разорни земјотреси со јачина од 7,7 и 7,6 степени според Рихтеровата скала во понеделникот ги погодија јужните делови на Туркије со епицентар во Кахраманмараш, а бројни спасувачки екипи сé уште ревносно работат на пребарување и спасување на луѓето затрупани во урнатините на зградите.
Ресорниот турски министер Коџа вечерва изјави дека околу 20.000 спасени се префрлени во други региони.
Турскиот претседател Ердоган денеска во Адијаман изјави дека турскиот народ се соочува со една од најголемите природни катастрофи во историјата.
Дирекцијата за управување со катастрофи и вонредни состојби (АФАД) соопшти дека во операциите за пребарување и спасување на терен работат најмалку 159.146 лица. На терен се и 7.716 странски спасувачи.
Евакуирани се над 100.000 луѓе од регионите на Туркије погодени од земјотресот.
Турското Министерство за надворешни работи соопшти дека 97 држави изразиле подготвеност да му помогнат на турскиот народ.
Извор: www.aa.com.tr
