Пред утрешното обраќање пред конгресот под слоганот „Америка на прво место“, американскиот претседател Доналд Трамп во Вашингтон денеска со неговите највисоки соработници за национална безбедност, вклучително и државниот секретар Марк Рубио и секретарот за одбрана Пит Хегсет, одлучува за низа политички опции за Украина, вклучително и суспендирање на американската воена помош за Киев.
Според „Њујорк Тајмс“, на состанокот е и можното суспендирање на пратките со муниција и опрема за Украина, кои беа одобрени за време на администрацијата на поранешниот американски претседател Бајден. Трамп изјави дека граѓаните на САД треба помалку да се грижат за рускиот претседател, а повеќе за мигрантските банди и нарко-босовите, за како што напиша, да не завршат како Европа
„Треба да трошиме помалку време за да се грижиме за Путин и повеќе да се грижиме за мигрантските банди силувачи, нарко босови, убијци и луѓе од ментални институции кои доаѓаат во нашата земја – за да не завршиме како Европа.“ – Донал Трамп.
Во согласност со најавата на Трамп, Њујорк Тајмс објави дека американскиот секретар за одбрана Пит Хегсет и наредил на американската сајбер команда да ги запре офанзивните сајбер операции против Русија, во обид САД да ги обноват односите со Русија и да постигнат мировен договор со Москва за Украина. Американскиот државен секретар Марко Рубио изјави дека Вашингтон е подготвен да ги обнови контактите со Украина откако Киев ќе ја покаже својата подготвеност за мир.
„Белата куќа ќе биде подготвена да ги обнови контактите кога Украина ќе биде подготвена за мир, а тоа е очигледно она што американскиот претседател го поставува како своја цел.“ – Марко Рубио државен секретар на САД.
Украинскиот претседател Володимир Зеленски изрази уверување дека може да ги обнови односите со Трамп по нивната тензична средба во Овалната соба исполнета со несогласувања. Тој рече дека разговорите со Трамп треба да продолжат во поинаков формат и додаде дека се уште е подготвен да потпише договор за ретките метали со САД. Зеленски изјави дека е подготвен да поднесе оставка доколку Украина за возврат стане членка на НАТО.
„Јас во замена за НАТО? Замената е можна. Реков дека сум подготвен да заминам, а за возврат стануваме членка на НАТО – ова го кажувам уште од почетокот на војната со Русија. Ако влеземе во НАТО, тоа значи дека ја исполнив мојата мисија.“ – Володимир Зеленски претседател на Украина.
Портпаролот на Кремљ Дмитриј Песков изјави дека режимот во Киев не сака мир и дека во оваа ситуација очигледно нема да бидат доволни напорите на Вашингтон и подготвеноста на Москва.
„Режимот во Киев и Зеленски не сакаат мир, тие сакаат војната да продолжи, така што во оваа ситуација, се разбира, очигледно нема да бидат доволни само напорите на Вашингтон и подготвеноста на Москва.“ – Дмитриј Песков.
Високата претставничка на ЕУ за надворешна политика и безбедност Каја Калас изјави дека желбата на Брисел да соработува со Вашингтон се заснова на принципите за кои САД отсекогаш се залагале, а тоа се слободата и независноста, односно основните принципи на меѓународното право, но дека.Вашингтон го промени ставот по разговорите со Русија
„За нас беше изненадување што САД наеднаш ја сменија својата позиција. Морам, знаете, навистина да нагласам дека заедно со новата администрација подготвивме резолуција за поддршка на Украина. Но, кога се сретнаа со Русите, потоа нешто се случи, бидејќи однесувањето се промени.“ – Каја Калас – висока претставничка на ЕУ за надворешна политика и безбедност.
Во меѓувреме, Франција и Велика Британија не се договорија за план за делумно примирје за Украина во траење од еден месец.
Извор: 24vesti.mk
