ИСТАНБУЛ (АА) – Јужнокорејскиот претседател Јун Сук Јеол, неколку часа пред гласањето за импичмент, ѝ се извини на нацијата денес за неговиот обид за наметнување воена состојба, јавува Анадолу.
„Искрено се извинувам што предизвикав вознемиреност и непријатност кај луѓето“, рече Јун во телевизиско обраќање, осврнувајќи се на декретот што го издаде доцна во вторникот.
Јун рече дека нема да има таков обид за повторно воведување на воена состојба.
За политичката стабилност во земјата, Јун истакна дека „одлуката ѝ ја препушта на владејачката Партија на моќта на народот (ППП) да одлучи за неговата влада и за неговото преостанато време на функцијата, кое завршува во 2027 година.
Јун, кој се соочува и со обвиненија за предавство, истакна дека нема да ја избегне правната и политичката одговорност.
Тој воведе воена состојба во 22:25 часот по локално време, но објави дека е укината по шест часа, во 4:27 часот во среда.
Потегот беше отфрлен откако пратениците побрзаа во Парламентот и го отфрлија неговиот декрет.
Шест опозициски партии потоа поднесоа барање за импичмент на Јун, за кое треба да се гласа околу 17 часот денес по локално време.
Потегот на опозицискиот блок, сепак, зависи од поддршката од ППП.
За успешна иницијатива за импичмент, на опозицискиот блок му е потребна поддршка од најмалку осум дополнителни пратеници на ППП за да го достигне минималниот праг од 200 во Парламентот од 300 места.
Вторникот беше 17-ти пат од 1948 година кога во Јужна Кореја е воена состојба.
„Ова е ситуација во која претседателот не може нормално да ги извршува своите должности“, рече претседателот на ППП, Хан Донг-хун, по обраќањето на Јун.
Тој додаде дека оставката на претседателот е „неизбежна“.
Извор: Anadolu Agency (AA)
