Европратеничката Ирена Јовева денеска преку Инстаграм испрати јасна порака по повод претстојното гласање за извештајот на Европската комисија за напредокот на Северна Македонија, закажано за следната недела на пленарната седница во Европскиот парламент.
Објавата започнува на македонски јазик, што Јовева го направи со, како што вели, „оправдана причина“. Таа се осврнува на неодамнешните обиди некои политичари да го оспорат статусот на македонскиот јазик, алудирајќи на тоа дека го нарекуваат „модерен“ јазик, без реална основа.
„Дали постојат ‘модерни’ јазици? Дали постои ситуација во која еден формално признат јазик, одеднаш станува ‘модерен’ само затоа што некој така решил?“, прашува Јовева во објавата.
Таа посочува дека извештаите на Европската комисија за земјите-кандидати се технички и професионални документи, наменети за објективна оценка на напредокот и не треба да се користат за политички манипулации, особено не во однос на идентитетски прашања.
„Оригиналната верзија на извештајот е реална, но некои политичари не би биле политичари ако не прават драма околу сè што има врска со македонскиот народ, јазик и идентитет“, истакнува Јовева.
Таа додава дека го избира патот на разумот: „Јас ја бирам страната каде што идентитетот на нацијата е оставен на мир. Каде што јазикот на нацијата е оставен на мир.“
На крајот, Јовева упатува и емотивна порака: „Од срце ѝ посакувам сè најдобро и најубаво на татковината на моите родители. Но за жал, таму е сè освен тоа.“
Преводот на словенечки и подолгата верзија на објавата, како што наведува, се достапни на нејзината официјална страница на Фејсбук.
ИЗВОР: racin.mk
