Формирање на Инспекторат за македонски јазик, стипендирање студенти за изучување на македонскиот јазик во сите три циклуси на високото образование, како и задолжително изчување на македонскиот јазик во два семестра и на државните и на приватните универзитети, се дел од новините кои ги содржи Предлог-законот за употребата на македонскиот јазик.
Во Националната и универзитетска библиотека (НУБ) „Св. Климент Охридски“ денеска се одржа јавна дебата за предлогот кој го подготвија Советот за македонски јазик и Министерството за култура, а кој е јавно достапен на Електронскиот национален регистар на прописи на Македонија (ЕНЕР).
Министерката за култура Бисера Костадиновска-Стојчевска рече дека периодов се усовршувал Предлог-законот откако процесот запре во 2020, по Јавната дебата на која пристигнаа голем број забелешки кои темелно беа разгледани и вметнати во оваа верзија на Предлог-законот.
„Јазикот е нашиот темел, израз на нашиот идентитет. Затоа, секој стручен влог во донесување на правната рамка за негова употреба, чување на неговите посебности е драгоцен придонес за нас самите и за нашата државност“, рече Костадиновска-Стојчевска.
Претставувајќи го Предлог-законот, проф. д-р. Елизабета Бандиловска, членка на Советот за македонски јазик, кажа дека во практиката сè повеќе се забележува непочитувањето на законските мерки и негрижата за македонскиот јазик во различни сегменти и на различни нивоа од општествениот живот.
Предлог-законот го претстави проф. д-р. Елизабета Бандиловска, членка на Советот за македонски јазик. (Фото: К. Попов)
„Водејќи се од потребата за подигање на јазичната култура, негувањето и заштитата на македонскиот стандарден јазик и неговото кирилско писмо, како и афирмирање на потребата од зголемена општествена и индивидуална грижа за правилната употреба на македонскиот јазик во јавната комуникација, се предлага донесување нов Закон за употребата на македонскиот јазик со кој ќе се прошират областите во кој задолжително се употребува македонскиот стандарден јазик“, додаде Бандиловска.
За Инспекторатот за македонски јазик, тоа би бил орган во состав на Министерството за култура со својство на правно лице, чија цел ќе биде дејствување на терен и подигнување на свеста за важноста од правилната употреба на македонскиот јазик. Ќе се изработува и Национална стратегија за македонскиот јазик, за што ќе биде вклучен Советот за македонски јазик и значајни високообразовни институции.
Министерството за образование и наука (МОН) во текот на академската година ќе објавува конкурс за стипендирање студенти за изучување на македонскиот јазик во сите три циклуси на високото образование.
Меѓу забелешките кои се истакнаа на дебатата беше дека никаде не се споменува оти македонскиот јазик е задолжителен за сите државјани на Македонија, како и тоа на кој јазик се комуницира во странство и како ќе им бидат напишани имињата на македонските учесници на некој настан. Коментарите и забелешките, како што кажа и министерката, ќе бидат разгледувани.
Б. НЕСТОРОСКА
ИЗВОР: sdk.mk
