Министерката за образование и наука Весна Јаневска во Аргумент плус рече дека новата концепција за средно гимназиско образование која се подготвува периодов ќе внесе нов пристап на учење преку кој учениците ќе се мотивираат да учат и напредуваат.
Според неа, со новата програма ниту еден наставник нема да остане без работа туку ќе им се дозволи на учениците да се насочат кон својата иднина.
„Програмата за средно гимназиско образование не е менувана повеќе од 20 години и не ги дава очекуваните и потребни резултати. Програмата мора да се промени за учениците да бидат подготвени и иако средното гимназиско образование треба да даде општа претстава сепак ние понудивме нова концепција која е иновативна. Тоа значи дека во текот на четири години учениците ќе имаат обврзни предмети а во последните две ќе имаат изборни предмети од областа на технологијата и природно математичките науки и од општествените науки“, рече Јаневска и објасни дека иако со новата концепција предметот филозофија ќе се воведе како изборен сепак учениците ќе имаат можност да го изберат.
„Концепцијата е ставена на јавна расправа и во моментов собираме сугестии и се обидуваме да најдеме баланс. Проблемот тука е што филозофијата е изборен предмет и има страв дека нема да биде биран од учениците но јасно е дека учениците нема по цели паралелки да бираат предмети туку ќе бираат во согласност што она ги интересира“, изјави министерката и додаде дека критичкото мислење не се изучува само во предметот филозофија туку и во останатите предмети.
Јаневска потенцираше дека и понатаму во фокусот на МОН ќе останат проблемите со нерегуларостите, несоодветниот кадар и акредитацијата на студентските програми за кои итно мора да се изнајдат решенија.
Извор: 24vesti.mk
