АЛ КУДС (ЕРУСАЛИМ) – Група Израелци организираа демонстрации денес во израелскиот Парламент (Кнесет) во Западен Ал Кудс (Ерусалим), барајќи предвремени избори и прекин на војната на Тел Авив против Појасот Газа, објавија израелските медиуми, пренесува Анадолу.
„Група демонстранти се собраа во близина на кафетеријата во зградата на Кнесетот, барајќи предвремени избори“, објави израелскиот дневен весник „Харец“.
„Војната без цели и без крај мора да биде завршена, Кнесетот мора да биде распуштен, а власта да им биде вратена на луѓето. Бараме избори веднаш“, порачаа демонстрантите.
Последните избори во Израел се одржаа кон крајот на 2022 година, што резултираше со формирање на сегашната Влада на чело со премиерот Бенјамин Нетанјаху, кој легално е на власт со четиригодишен мандат, освен ако Кенсетот не се распушти или ѝ се искаже недоверба на Владата.
Прекршувајќи ја Резолуцијата на Советот за безбедност на Обединетите нации (ОН) за итен прекин на огнот, Израел се соочи со меѓународна осуда поради континуираните напади врз Појасот Газа од 7 октомври 2023 година.
Пред осум месеци Израел започна брутална воена офанзива врз Појасот Газа со неселективно бомбардирање на цивилни населби, училишта, верски објекти и болници, убивајќи 37.396 Палестинци, од кои поголем дел жени и деца.
Извор: Anadolu Agency (AA)
