ЛОНДОН (АА) – Новинарката на Би-би-си (BBC) Ањана Гадгил во разговор со поранешниот израелски премиер Нафталин Бенет, на изјавата на Бенет дека „палестинските деца се милитанти“, возврати со реченицата: „Израелските сили со задоволство убиваат деца“, пренесува Анадолу.
Поранешниот премиер Бенет за време на вчерашното гостување во програмата на Би-би-си, зборувајќи за израелските напади на Џенин, Палестинците убиени во операцијата ги нарече „терористи“, а водителката Гадгил го потсети дека Обединетите нации (ОН) тие лица ги дефинира како „деца“.
Потоа Гадгил на Бенет му го постави прашањето: „Израелските сили тоа го нарекуваат ‘воена операција’, но сега знаеме дека се убиени млади луѓе, вклучително и четири лица помлади од 18 години. Дали навистина тоа е целта на војската? Да убива лица на возраст од 16 до 18 години?“
Во својот одговор Бенет повтори дека 11 лица од загинатите во операцијата на израелската војска биле „милитанти“ и истакна: „Тоа што млади терористи одлучиле да земат оружје, тоа е нивна одговорност.“
По одговорот на Бенет, водителката Гадгил ги опиша мртвите како „деца“ и рече: „Израелските сили со задоволство убиваат деца“, на што Бенет возврати: „Знаете, навистина е неверојатно тоа што го велите, бидејќи нѐ убиваат нас.“
Водителката во продолжение истакна: „ОН ги идентификува како деца и знаеме дека во оваа таргетирана операција се убиени 4 лица на возраст од 16 до 18 години. Да не заборавиме дека се работи за таргетирана акција. Израелските сили продолжуваат да трагаат по овие луѓе“.
По изјавата на новинарката, Бенет го даде следниот коментар: „Ја правиме вистинската работа. Тие убиваат цивили и мислам дека е неприфатливо вие на тоа да правите морален еквивалент или уште полошо.“
– Реакцијата на Бенет на зборовите на водителката на Би-би-си
Поранешниот израелски премиер Бенет, како реакција на зборовите на новинарката на Би-би-си, на социјалната мрежа Твитер објави: „Новинарката на Би-би-си, која го водеше интервјуто, се осмели да ми тврди дека ‘војниците на израелската војска се среќни од убивање деца’.“
– Израелски напади на Џенин
Израелската војска изврши напад на градот Џенин и на бегалскиот камп Џенин на 3 јули (понеделник) и го опколи регионот.
Во воздушните и копнените напади на израелските сили, кои траеја 48 часа, животот го загубија 12 Палестинци, од нив четири деца. Во овие напади се ранети 120 лица, а меѓу нив 20 се во тешка здравствена состојба.
Израелската војска, повлекувајќи се од бегалскиот камп, соопшти дека загинал еден војник.
Извор: www.aa.com.tr
