Според нацрт-планот што го преставил Галант, Израел ќе ја задржи севкупната безбедносна контрола на Газа, а мултинационални сили ќе ја преземат одговорноста за обнова на територијата, разрушена од изралеското бомбардирање. Соседен Египет, исто така, ќе има неодредена улога според планот, во кој се наведува дека Палестинците ќе бидат одговорни за управување со територијата
Израелскиот министер за одбрана Јоав Галант синоќа го претстави нацрт-планот за повоеното управување со Појасот Газа, според кој ниту Хамас, ниту Израел нема да владеат со палестинската територија по завршувањето на непријателствата, јавуваат светските медиуми.
Според Галант, палестинската власт на територијата ќе биде ограничена. Хамас повеќе нема да ја контролира Газа, а Израел ќе ја задржи севкупната безбедносна контрола, рекол министерот.
Нацрт-планот за „денот потоа“, Галант го презентираше пред новинари во очи на посетата на американскиот државен секретар Ентони Блинкен на регионот.
Посетата на Блинкен треба да се случи овие денови, а во нејзините рамки се очекува тој да се сретне и да разговара со палестинските претставници од окупираниот Западен Берг и со израелските лидери.
Неговата посета, како што потсетува британскиот национален сервис, доаѓа во услови на зголемени тензии во регионот по атентатот на еден од водачите на Хамас, Салех ал-Арури што се случи во вторникот во главниот град на Либан, Бејрут. За неговото убиство милитантната група го обвинуваИзраел, кој ниту ја потврдува, ниту ја негира вмешаноста во убиството.
Инаку, според нацрт-планот што го преставил Галант, Израел ќе ја задржи севкупната безбедносна контрола на Газа, а мултинационални сили ќе ја преземат одговорноста за обнова на територијата, разрушена од изралеското бомбардирање.
Соседен Египет, исто така, ќе има неодредена улога според планот, во кој се наведува дека Палестинците ќе бидат одговорни за управување со територијата.
„Жителите на Газа се Палестинците, затоа палестинските тела ќе бидат одговорни, под услов да нема непријателски активности или закани против државата Израел“,
рекол Галант.
Инаку, разговорите за „денот потоа“ во Газа доведе до длабоко несогласување во Израел.
Некои од екстремно десничарските членови на владата на израелскиот премиер Бенјамин Нетанјаху сметаат дека палестинските граѓани треба да бидат охрабрени да ја напуштат Газа во егзил, а на територијата да бидат воспоставени еврејски населби. Ваквите предлози повеќе земји, како и некои од сојузниците на Израел ги отфрлија како „екстремистички“ и „неостварливи“.
Премиерот Нетанјаху не зборуваше јавно за никакви детали за тоа како мисли дека треба да се управува со Газа. Тој посочи дека војната во Газа може да трае уште неколку месеци, со наведената цел – целосно уништување на Хамас.
Објавувањето на планот доаѓа додека продолжуваат борбите во Газа, при што десетици луѓе загинаа во изминатите 24 часа, соопшти Министерството за здравство на Хамас.
Планот на Галант, исто така, наведува дека израелската војска има за цел да продолжи со следната фаза од војната во Газа. Тој, рекол дека израелските одбранбени сили (ИДФ) ќе заземат насочен пристап на северот на Појасот , каде што операциите ќе вклучуваат рации, уривање на тунели, како и воздушни и копнени напади.
На југ, израелската војска ќе продолжи со потрагата по лидерите на Хамас и спасување на израелските заложници.
Вкупниот број на луѓе убиени во Газа од почетокот на израелската одмаздничка кампања достигна повеќе од 22.400 заклучно со вчерашниот ден, што претставува речиси еден процент вкупниот број на жители на енклавата, кој се пронценува на околу 2,3 милиони, соопшти Министерството за здравство на Хамас.
Офанзивата на Израел врз Појасот Газа започна откако припадници на Хамас извршија ненадеен напад врз јужен Израел на 7 октомври, при што беа убиени 1 200 луѓе, повеќето цивили, а уште 240 беа земени како заложници.
Извор: 360stepeni.mk
