КУДС (ЕРУСАЛИМ) (АА) – Министерот за национална безбедност на Израел од крајната десница, Итамар Бен-Гвир, денес го нарече договорот за прекин на огнот и размена на затвореници со Хамас „голема грешка“, јавува Анадолу.
Израел треба да го испрати својот преговарачки тим во Египет во четврток за продолжување на преговорите за прекин на огнот во Газа и размена на затвореници со Хамас.
„Го уништуваме Хамас“, рече Бен-Гвир. „Ги слушам не само мислењата на функционерите во Кабинетот за безбедност, туку и командантите од теренот.“
„Сега го зајакнуваме ли Хамас со присуството на преговорите [во Каиро]? Тоа е голема грешка на премиерот.“
Министерот од крајната десница рече дека единствениот начин да се ослободат Израелците заробени од Хамас е преку „зголемен воен притисок“.
„Ако им го прекинеме горивото, во рок од една недела тие ќе клекнат на колена. И ако ги запреме камионите [со помош], во рок од две недели тие ќе клекнат на колена. Па зошто одиме да правиме договор, особено таков неодговорен договор?“ рече тој.
Израелскиот весник „Једиот Ахронот“ рано утрово објави дека израелскиот премиер Бенјамин Нетанјаху се соочува со зголемен притисок од САД да продолжи со преговори за договор со Хамас, дури и ако тоа значи „пад на неговата Влада“.
Според весникот, претстојната рунда преговори во Каиро се смета за „последна апсолутна шанса“ да се постигне прекин на огнот во Газа и регионално.
Египет, Катар и САД со месеци предводат индиректни преговори меѓу Израел и Хамас, на кои не е постигнат договор поради одбивањето на Израел да ги исполни барањата на Хамас да се стави крај на војната, да ги повлече војниците од Газа и да им дозволи на раселените Палестинци да се вратат во северна Газа.
Израел продолжи со разорната воена офанзива во Појасот Газа, која започна по нападот на Хамас на 7 октомври минатата година, и покрај резолуцијата на Советот за безбедност на ОН со која се бара итен прекин на огнот.
Во израелските напади досега убиени се речиси 39.800 Палестинци.
Израел е обвинет за геноцид пред Меѓународниот суд на правдата (МСП), кој му нареди веднаш да ја прекине својата воена операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.
Извор: Anadolu Agency (AA)
