Израелскиот Кабинет за безбедност одобри континуирано присуство на армијата во коридорот Филаделфи

АНКАРА (АА) – Кабинетот за безбедност на Израел одобри континуирано присуство на армијата во коридорот Филаделфи по должината на границата меѓу Газа и Египет, објави денес израелската јавна радиодифузна корпорација, јавува Анадолу.

Весникот „Хаарец“, исто така, објави дека осум члена на Кабинетот за безбедност гласале ‘за’, министерот за одбрана Јоав Галант гласал ‘против’, а министерот за национална безбедност Итамар Бен-Гвир бил воздржан.

Како одговор на тоа, Форумот за заложници и исчезнати семејства го критикуваше премиерот Бенјамин Нетанјаху, изјавувајќи дека не ја пропушта можност за да гарантира дека нема да има договор.

„Нема ден кога Нетанјаху не дејствува за да го загрози враќањето на сите заложници“, се вели во соопштението на семејствата.

Коридорот Филаделфи, демилитаризирана тампон зона од 14 километри по должината на границата меѓу Појасот Газа и Египет, останува критично прашање во тековните преговори за прекин на огнот и размена на заробеници меѓу Израел и Хамас.

Со месеци САД, Катар и Египет се обидуваат да постигнат договор меѓу Израел и Хамас за да се обезбеди размена на затвореници, да се воспостави прекин на огнот и да се дозволи хуманитарна помош да влезе во Газа.

Сепак, напорите за посредување се запрени поради одбивањето на Нетанјаху да ги исполни барањата на Хамас за запирање на војната.

Израел ја продолжува својата офанзива спроведувајќи брутални напади со неселективно бомбардирање на цивилни населби, училишта, верски објекти и болници врз Појасот Газа од 7 октомври минатата година и покрај резолуцијата на Советот за безбедност на ОН со која се повикува на итен прекин на огнот.

Според локалните здравствени власти, во нападите се убиени над 40.600 Палестинци, главно жени и деца, а повеќе од 93.800 се повредени.

Тековната блокада на Газа доведе до сериозен недостиг на храна, чиста вода и лекови, а голем дел од регионот е во урнатини.

Израел се соочува со обвиненија за геноцид пред Меѓународниот суд на правдата, кој нареди запирање на воените операции во јужниот град Рафа, каде што над еден милион Палестинци побараа засолниште пред областа да биде нападната на 6 мај.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.