КУДС (АА) – Израелската полиција денес употреби звучни бомби и солзавец врз Палестинците во Источен Кудс (Источен Ерусалим) за да ги спречи да стигнат до џамијата Ал Акса за да ја извршат петочната молитва, јавува Анадолу.
Палестинската Црвена полумесечина соопшти дека нејзините екипи „третирале две повреди предизвикани со тепање од страна на израелската полиција во Баб ал Амуд и Баб ал Асбат во Кудс.“
Веќе 11-ти петок по ред од почетокот на израелската војна во Газа, израелската полиција воведува строги ограничувања кои спречуваат десетици илјади луѓе да стигнат до џамијата Ал Акса за молитва.
Големи полициски сили се распоредени пред портите на Стариот град и поставени се барикади за да се спречат верниците да поминат. Израелската полиција им дозволува само на старите лица да поминат и да влезат во џамијата за молитва.
Официјален претставник на Одделот за исламски вакаф во Кудс за Анадолу изјави дека само 12.000 луѓе можеле да ја извршат петочната молитва во џамијата, во споредба со над 50.000 луѓе при редовните молитви пред да бидат воведени ограничувањата.
Израелската полиција нападна и десетици верници кои се собраа на молитва во населбата Вади ал Џоз во близина на Стариот град.
Очевидци за Анадолу изјавија дека израелската полиција употребила шок-бомби и солзавец кон Палестинците и ги бркала низ улиците користејќи отпадна вода.
Очевидци посведочија и за полициски напади врз верниците во подрачјето на Баб ал-Амуд и Баб ал-Сахира, каде што Палестинците се обидоа да извршат молитва на улица.
Израел започна со жестоки напади врз Појасот Газа по нападот на Хамас на 7 октомври, откога загинати се повеќе од 20.000 Палестинци, главно жени и деца, а повредени 52.586, според здравствените власти во енклавата.
Израелските напади ја претворија Газа во урнатини, а половина од станбениот фонд на крајбрежната територија е оштетен или уништен, а речиси 2 милиона луѓе се раселени во густо населената енклава поради недостиг од храна и чиста вода.
Се верува дека бројот на загинати во Израел изнесува 1.200.
Извор: www.aa.com.tr
