ЕРУСАЛИМ (АА) – Преминот Рафа во јужниот дел на Појасот Газа повеќе не е употреблив откако неговата палестинска страна беше целосно уништена од страна на израелската армија, објави денес израелското армиско радио, јавува Анадолу.
На видеоснимката објавена од радиото на социјалната мрежа X се покажа уништувањето предизвикано од израелската армија на преминот, при што главната сала изгледаше целосно израмнета, а околните згради урнати.
„Вака денес изгледа преминот Рафа, целосно уништен и повеќе не може да се користи, откако беше преземен од Бригадата 401 за една ноќ“, коментира радиостаницата.
„Поради неговата релативна близина до границата, израелската армија го користеше преминот како место за застанување и за одмор“, се додава.
Израелската армија на 7 мај ја презеде контролата врз преминот, еден ден откако Тел Авив објави воена операција во градот Рафа, кој беше преполн со раселени луѓе, непочитувајќи ги меѓународните предупредувања за последиците.
Радиото истакна дека армијата „ефикасно го контролира“ коридорот Филаделфи по должината на границата меѓу Газа и Египет.
„Израелската армија веќе почна да размислува за долгорочна контрола на коридорот Филаделфи“, се вели во соопштението.
На видеоснимката се гледа како израелски булдожер ги урива зградата во близина на коридорот Филаделфи и шаторите што раселените Палестинци мораа набрзина да ги напуштат пред израелскиот напад врз Рафа.
„Еве потсетување на тоа што беше во Рафа пред израелската армија да влезе во областа: масивни шатори за раселените луѓе и бегалците што сега се целосно празни“, објави радиото.
Во врска со судирите во областа, радиото извести дека израелските војници „се соочуваат со голем предизвик во Рафа, односни минирани згради.
Непочитувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Газа од нападот на Хамас на 7 октомври 2023 година.
Според локалните здравствени власти, оттогаш во Газа се убиени речиси 37.400 Палестинци, повеќето жени и деца, а повеќе од 85.400 се повредени.
Во текот на осум месеци од почетокот на израелската војна огромни делови од Газа се во урнатини, а има и целосна блокада за храна, чиста вода и лекови.
Израел е обвинет за геноцид пред Меѓународниот суд на правдата, чија последна пресуда му нареди на Тел Авив веднаш да ја прекине својата операција во Рафа, каде што над еден милион Палестинци побараа засолниште од војната пред да започне копнената офанзива врз градот на 6 мај.
Извор: Anadolu Agency (AA)
