КУДС/ЕРУСАЛИМ (АА) – Војната на Израел во Појасот Газа ќе заврши со предавање на лидерите на Хамас и враќање на заложниците, изјави денес портпаролот на израелскиот премиер Бенјамин Нетанјаху, јавува Анадолу.
„Војната во Газа може да заврши под услов лидерите на Хамас да ѝ се предадат на израелската армија и под услов заробениците да бидат вратени“, изјави за новинарите портпаролот Офир Генделман.
Тој рече дека армиските сили напредуваат во јужниот дел на Појасот Газа.
„Нашите сили ја опколија куќата на [лидерот на Хамас во Газа] Јахја Синвар [во Хан Јунис] и мисијата на нашите сили е да го уапсат колку што е можно поскоро“, додаде тој.
Генделман го отфрли повикот на генералниот секретар на Обединетите нации, Антонио Гутереш, за прекин на огнот во Газа.
„Овој повик за прекин на огнот сега е еднаков на повик да се задржи Хамас на власт во Газа. Ние категорично го отфрламе“, додаде тој.
Израел ја продолжи својата воена офанзива во Појасот Газа на 1 декември, кога заврши еднонеделната хуманитарна пауза со Хамас.
Според најновите информации на палестинското Министерство за здравство најмалку 17.177 Палестинци загинале, а над 46.000 се повредени во немилосрдните воздушни и копнени напади врз енклавата од 7 октомври по прекуграничниот напад на Хамас.
Бројот на загинати во нападот на Хамас во Израел изнесува 1.200, а 138 заложници сè уште се држат од палестинската група во Газа, според официјалните информации.
