Марван Баргути, најпопуларниот палестински лидер и човекот што би можел да ги обедини сите Палестинци, не е меѓу затворениците што Израел има намера да ги ослободи во замена за заложниците.
Баргути, 66, е лидер на Фатах, главниот политички ривал на Хамас, и се смета за можен наследник на претседателот Махмуд Абас, кој ја води Палестинската власт на Западниот Брег.
Хамас инсистира на негово ослободување, изјави за Ал Џезира високиот функционер Муса Абу Марзук, но Израел го смета за терорист.
Некои експерти велат дека Израел се плаши од Баргути од друга причина: како застапник на решението со две држави, иако поддржувал вооружен отпор кон окупацијата, Баргути би можел да стане обединувачка фигура за Палестинците.
Кој е Баргути?
Роден на Западниот Брег, Баргути ги предводеше студентските протести против израелската окупација додека студираше на Универзитетот Бир Зеит. Подоцна, тој стана еден од организаторите на првата палестинска интифада, која избувна во декември 1987 година.
Потоа Израел го протера во Јордан, но тој се врати на Западниот Брег во 1990-тите, како дел од привремените мировни договори што требаше да го отворат патот за создавање палестинска држава.
Тој стана лидер на Фатах на Западниот Брег, а кога избувна втората интифада, Израел го обвини дека е лидер на Бригадите на мачениците Ал-Акса, лабава мрежа на вооружени групи поврзани со Фатах кои извршуваа напади врз Израелци.
Баргути никогаш не коментираше за своите врски со Бригадите. „Јас не сум терорист, но не сум ни пацифист“, напиша тој во колумна за „Вашингтон пост“ во 2002 година.
Набргу потоа, Израел го уапси, а на судењето тој одби да се брани, бидејќи не ја признаваше авторитетот на израелскиот суд. Тој моментално отслужува повеќекратни доживотни затворски казни откако беше осуден во 2004 година во врска со нападите во Израел во кои загинаа пет лица.
Во затвор, тој предводеше повеќе од 1.500 затвореници во штрајк со глад што траеше 40 дена, барајќи подобри услови.
Извор: tv21
