КУДС (ЕРУСАЛИМ) (АА) – Израелската Влада објави тендер за изградба на речиси 1.000 станбени единици на окупираниот Западен Брег, јавува Анадолу.
Групата „Мир сега“, која ја надгледува изградбата на доселенички капацитети на Западниот Брег, објави дека ќе бидат изградени 974 станбени единици за доселениците во населбата Ефрат, јужно од Витлеем.
Тие предупредија дека изградбата на целата населба ќе го спречи развојот на Витлеем на југ и во случај на израелска анексија на областа, целиот јужен дел од Западниот Брег ќе биде отсечен.
Израелската организација го обвини премиерот Бенјамин Нетанјаху дека им наштетил на интересите на Израел и го поткопува дводржавното решение преку наметнување на реалноста на теренот.
„Додека погледот на израелскиот народ е насочен кон ослободувањето на заложниците и крајот на војната, Владата на Нетанјаху работи ‘на стероиди’ за да воспостави нова фактичка состојба на теренот и на тој начин да ја уништи шансата за мир и компромис“, велат тие.
Деветнаесет израелски заробеници и пет работници од Тајланд се ослободени во замена за 1.135 палестински затвореници според договорот за прекин на огнот во Газа што стапи на сила на 19 јануари.
Меѓународната заедница, вклучително и Обединетите нации, сметаат дека израелските населби на Западниот Брег се кршење на меѓународното право. ОН постојано предупредуваа дека проширувањето на нелегални населби го загрозува решението за две држави, рамка што се смета за клучна за ставање крај на повеќедеценискиот израелско-палестински конфликт.
Во јули 2024 година Меѓународниот суд на правдата ја прогласи окупацијата на Палестина од страна на Израел за нелегална. Тој побара иселување на сите постојни населби на Западниот Брег и Источен Ерусалим (Источен Кудс).
Извор: Anadolu Agency (AA)
