АНКАРА (АА) – Израел денес најави дека поставува „целосна опсада“ врз Појасот Газа поради интензивираните борби со палестинската група Хамас, пренесува Анадолу.
„Наредив целосна опсада на Појасот Газа“, соопшти израелскиот министер за одбрана Јоав Галант по седницата за проценка на Армијата, јави „Тајмс оф Израел“.
„Нема да има струја, храна, гориво, сè е затворено (за Газа)“, нагласи Галант.
Рано утрово, израелската Армија потврди дека во текот на ноќта извршила напади на над 500 цели во Газа, тврдејќи дека тоа биле позиции на Хамас и Исламски џихад.
Групата на отпорот Хамас, со седиште во Газа, во саботата ја започна операцијата „Поплава Ал-Акса“ против Израел, истрелувајќи бараж ракети. Групата соопшти дека ненадејниот напад е одговор на упадот во џамијата Ал Акса во окупираниот Источен Кудс (Ерусалим) и зголеменото насилство од еврејските доселеници.
Како одмазда, израелската Армија ја започна операцијата „Железни мечеви“ против Хамас во Појасот Газа, во којашто загинаа 560 Палестинци, додека повредени се најмалку 2.900.
Според израелското Министерство за здравство, во судирите загинале најмалку 700 Израелци, а над 2.300 се ранети.
