„Регулаторната комисија за енергетика, ги повикува политичките партии да не ги политизираат одлуките на РКЕ кое е независно тело.“
Регулаторна со апел, но партиите денеска се „запалија“ на темата и не штедеа навреди едни кон други.
„Астрономски високите сметки за струја се директна последица на неспособноста на владата на Мицкоски и ВМРО ДПМНЕ. Со укинувањето на субвенциите за струја, ВМРО ДПМНЕ жестоко удри по џебот на граѓаните… Соочени со сметки кои достигнуваат од по 8.000, 10.000, 15.000 денари, дел од граѓаните бараат начин како да ги платат, а други бараат коригирање на сметките. Ова е се само дел од низата погрешни одлуки и политики на ДПМНЕ со кои за осум месеци го сразија стандардот на граѓаните.“, вели Богданка Кузеска.
СДСМ ја повика Владата итно да донесе одлука за укинување или намалување на ДДВ-то за струја и парно, како помош за граѓаните да го пребродат овој тежок период.
Писмено одговорија од ВМРО ДПМНЕ.
„Класично лицемерие и уште еден од низата на обиди за манипулација со граѓаните од истата СДС која ги осиромаши граѓаните и го уништи животниот стандард. СДС го зголемија ДДВ на прехранбени производи од 5% на 10% и денес апсурдно е да сугерираат за намалување на истото“, велат од ВМРО-ДПМНЕ
Инаку, вчера РКЕ ги повика сите домаќинства кои добиле сметки за електрична енергија и имаат за прв пат фактурирана потрошувачка во четврт блок, да побараат од ЕВН Хоме кој е должен, да ги корегира сметките за електрична енергија и да направи соодветна распределба по блокови согласно историјатот на просечната потрошувачка на домаќинството во последните три пресметковни периоди. РКЕ им посочи на потрошувачите кои се незадоволни од пресметката на потрошената енергија и износот на сметката дека имаат право да вложат приговор до универзалниот снабдувач ЕВН ХОМЕ и доколку потрошувачот не е задоволен од добиениот одговор или не добијат одговор во законски предвидениот рок од осум дена, имаат право да поднесат приговор до РКЕ како второстепен орган.
„За приговорот до РКЕ нема пропишано посебна форма/формулар и кон истиот треба да приложат: копија од вложениот приговор до ЕВН ХОМЕ, одговорот од ЕВН ХОМЕ и копија од сметката по која приговараат“
Приговорот може да се достави во архивата на РКЕ или електронски по е-маил на [email protected] и [email protected]. Против решенијата на РКЕ незадоволната странка може да поведе Управен спор.
Регулаторна потсети дека од 1 јануари 2025 година цената на струјата за просечна потрошувачка во сите четири блокови е зголемена за помалку од еден процент или точно за 0,92 отсто.
ИЗВОР: ТВ 21
