Големиот пожар што вчера избувна во близина на пристанишниот град Рафина во источниот дел на областа Атика, поширокиот регион на Атина е целосно изгасен, додека пак на островот Крит е ставен под контрола, меѓутоа пожарникарите се во состојба на готовноста за да спречат евентуални нови разгорувања, јави дописничката на МИА од Атина.
Пожарот кај градот Јерапетра во југоисточниот дел на островот Крит избувна во средата, поради силниот ветер брзо се прошири и беа евакуирани илјадници жители и туристи од околните места.
Доцна синоќа имаше ново разгорување во непрооден дел, но веднаш беше ставено под контрола, додека утрово не постои активно жариште.
Интервенираат 230 пожарникари со 13 пешадиски тима, 46 возила и група беспилотни летала, како и воздушни средства.
Според локалните медиуми од островот, во општините зафатени од пожарот прогласена е вонредна состојба.
И на Крит и во близина на Атина, во големите пожари изгореа домови, а дополнително ќе се проценува предизвиканата материјална штета.
Извор: kurir.mk
