Првиот вицепремиер и воедно кандидат на ВЛЕН за градоначалник на Општина Чаир, Изет Меџити, остро реагираше по последните случувања со насилство во Тетово и расистичките повици во Куманово.
На новинарско прашање за синоќешниот случај со Војводите во Тетово, Меџити јасно истакна дека државата веќе постапила и дека сторителите се лишени од слобода.
„Веќе се преземени мерки, бев во постојан контакт со органите на редот, сторителите се лишени од слобода, јас ги осудувам овие случаи. Ќе упатам апел сите да бидат на ниво на одговорност, ги осудуваме овие акти и сторителите ќе добијат ригорозен одговор од државата за какви било случаи што го нарушуваат правото и слободата на граѓанинот,“ изјави Меџити.
И за случајот со расистичките повици во Куманово, Меџити информираше дека институциите не останале пасивни, туку се преземени конкретни акции.
„Имаше претреси, се повикани на информативни разговори и се работи на случајот,“ изјави Меџити.
Според првиот вицепремиер Изет Меџити, оваа влада ја докажува решителноста да не дозволи повторување на сценарија на насилство и етничка омраза, уверувајќи ги граѓаните дека секој таков сторител ќе ја добие најтешката казна од државата.
