Пред три дена, градоначалникот на Тетово, Биљал Касами, ги посети библиотеките на пет средни училишта, каде што подели 4.450 лектири со 62 различни наслови. Ова предизвика реакција од издавачката куќа „Онуфри“, која тврди дека книгите на Исмаил Кадаре се украдени, бидејќи – како што додаваат – само оваа издавачка куќа има ексклузивно право да ги објавува делата на писателот.
Бујар Худри дошол од Тирана во Тетово, каде што поднел кривична пријава против Општината.
„Причината зошто доаѓам тука да ја тужам општината е тоа што е скандалозно државата да земе украдена стока и да ја донира. Ќе ја тужам општина Тетово затоа што не познавам никого кој го направил тоа. И она што го кажувате дека училиштата го купиле, општината го купила и донирала. Книгата на Исмаил Кадаре, неговата иконска книга „Генералот на мртвата армија“, е објавена со различна корица и под името на издавачката куќа „Рилиндја“, додека сите знаеме дека Онуфри ги има ексклузивните права врз Кадаре“, изјави Бујар Худри.
Од Општина Тетово ги отфрлаат обвинувањата велејќи дека ниту Општината ниту градоначалникот Касами не ги купиле книгите.
„Книгите ги купија самите средни училишта, со свои средства, а беа купени од издавачката куќа „Чабеј“ од Тетово. Ние како општина не сме купиле книги, а камоли раководителот на општината. Во една од неговите објави на социјалната мрежа се вели дека шефот на општината продавал книги, а тоа е огромна лага. Во петокот, градоначалникот ги посети средните училишта за да ја види залихата на книги што ги купија самите средни училишта. Доколку се докаже дека има повреда на авторските права, сигурно ќе ги повлечеме книгите“, вели Албион Алили, портпарол на Општина Тетово.
Од Општината, исто така, соопштија дека доколку Издавачката куќа „Онуфри“ јавно не се извини за обвинувањата против Касами, ќе поднесат кривични пријави. Инаку, Општина Тетово пред неколку дена го прогласи писателот Исмаил Кадаре за почесен граѓанин.
ИЗВОР: ТВ 21
