Денеска во Центарот за обука – Идризово официјално беше отворена обуката за борба против подведување и трговија со луѓе, која ќе се реализира во периодот од 9 до 12 февруари.
На обуката учествуваат 12 полициски службеници и јавни обвинители, со цел унапредување на нивните капацитети за препознавање, спречување и ефикасно постапување во случаи поврзани со трговија со луѓе и подведување.
Заменик-министерот за внатрешни работи, Астрит Исени, нагласи дека овие кривични дела претставуваат сериозен облик на организиран криминал и дека нивното успешно сузбивање бара континуирана едукација, како и силна институционална соработка меѓу надлежните органи.
Обуката се реализира со поддршка на Француската амбасада во Скопје, при што Исени изрази благодарност за долгогодишната соработка и поддршката во зајакнувањето на капацитетите на институциите во борбата против трговијата со луѓе и подведувањето.
