ТЕХЕРАН (АА)
Најмалку 73 лица загинаа кога одекнаа повеќе експлозии во близина на гробот на генералот Касем Сулејмани во иранската провинција Керман, објавија државните медиуми, пренесува Анадолу.
Како што објави иранската државна телевизија, две експлозии се случиле на патот што води до гробот каде што се одржуваше комеморација по повод четвртата годишнина од атентатот на командантот на елитната единица на Иранската револуционерна гарда, Касем Сулејмани.
Причината за експлозиите останува непозната. Некои медиуми јавуваат дека тие биле предизвикани од канистри со гас.
Несреќата се случила кога десетици илјади луѓе се собрале во родниот град на Сулејмани, Керман, за да ја одбележат четвртата годишнина од неговиот атентат.
Сулејмани беше убиен на 3 јануари 2020 година во напад на американско беспилотно летало пред аеродромот во Багдад, Ирак.
Државните медиуми јавуваат дека претставници на Црвената полумесечина во Керман изјавиле дека од местото на несреќата во болница однеле најмалку 50 лица.
Иранските служби за итни случаи ги ставија во состојба на готовност сите болници и здравствени центри за да им помогнат на повредените.
Официјални лица во Техеран сè уште немаат коментар.
