СУЛЕЈМАНИЈА (АА) – Со чеканите како нивна главна алатка, ирачките работници се трудат од утро до вечер во врелите летни горештини на градот Сулејманија за да си заработат за егзистенција, јавува Анадолу.
Камената изработка, која некогаш беше многу ценета во изградбата на куќи и згради, падна во немилост поради зголемената употреба на индустриски градежни материјали.
Иако бројот на каменоресци е во опаѓање, некои работници продолжуваат да се занимаваат со овој занает, за кој е потребна вештина трпеливо да се исечат и средат камењата за згради со сложени шари.
Лутфула Исмаил, 59-годишен ирачки каменорезец, за Анадолу изјави дека својата професија ја започнал на 18-годишна возраст и со тоа се занимава веќе 41 година.
„По ископувањето на почвата што ги покрива камењата, ги извлекуваме нив. Ги испраќаме овие камења низ целиот курдски регион, од Халабџа до Ербил“, рече тој.
Исмаил истакна дека белите камења имаат поголема вредност поради нивната убавина и се многу барани поради нивната реткост.
Ејуб Мурадани, 35-годишен каменорезец, 15 години ја работи оваа професија, и работел од утро до вечер, сечејќи и средувајќи камења.
Мурадани нагласи дека на резба на камења работат во текот на целата година, без разлика на сезоната, бидејќи камењата што ги резбаат се користат за градење ѕидови.
„Ова е работа која бара упорност и многу малку луѓе можат да се справат со неа. Ако каменот има многу детали и украси работникот може да изработува од седум до 12 камења дневно, но ако има помалку детали, овој број може да се зголеми на 20 до 25 камења“, додаде Мурадани.
Извор: www.aa.com.tr
