Естрада и политиканство, вака премиерот Мицкоски ги коментира барањата за разрешување и оставка на првата антикорупционерка Татјана Димитровска која се уште не поднела ниту допис за оставка до Собранието каде што беше именувана, а се сомничи за издавање на службена тајна.
Мицкоски денеска одговарајќи на новинарски прашања дали размислуваат во Собранието да покренат иницијатива за нејзино разрешување само посочи дека било крајно време да се стави крај на естрадата и дека има два начини за одговорност морална и онаа преку судските инстанци кога ќе докажат. Обиди преку собрание вели се покажале како неуспешни откако се гласаше интерпелација за членовите на судскиот совет и за тоа вели надлежните институции треба да се остават да постапуваат.
Со сличен синхронизиран став денеска и собранискиот спикер Гаши кој на брифингот со новинарите посочи дека додека нема правосилна судска пресуда Собранието не може да дискутира за одговорноста на првата антикорупционерка освен во делот на етиката и моралот но за тоа потребно е иницијатива од некој од пратениците и тоа најпрвин на комисијата за избори и именувања.
Африм Гаши Претседател на Собрание на Р.С.М
– Треба да има правосилна судска пресуда. Како што знаете, процедурата е пропишана во Деловникот и за тоа ќе одлучува Комисијата за прашања на изборите и именувањата. Значи, ако има било каква постапка, треба да се отпочне од таа Комисија. И ако тие одлучат можат да донесат каква било одлука. За разрешување, тие треба да донесат одлука па тоа да се процесира на пленарна седница. Што и да одлучи Комисијата, јас ќе го процесуирам во пленарна седница.
ТВ 24 се обиде да стапи во контакт и со претседателот на комисијата за избори и именувања Ѓоргија Сајковски но не одговори на нашите повици. Од пратеничката група на Левица пак денеска најавија дека тие ќе ја иницираат оставката односно дека ќе достават предлог за разрешување на Димитровска во законодавниот дом и дека не дозволено е Собранието да биде пасивно во една ваква ситуација.
Претседателот на собранието Гаши пак меѓудругото додаде дека законските услови не се исполнети се уште за собранието да расправа и дека не може тоа надвор од закон да се прави . Сепак посочи дека комисијата си има пратеник кој ја води и има правилник за работа но и дека мора внимателно да се постапува во вакви ситуации за да не се прекршат законите и процедурите.
Извор: 24vesti.mk
