Авион на „Ер Индија“ во кој имало 244 патници со лет кон Лондон се урна денеска кратко по полетувањето во близина на аеродромот Ахмедабад. Патничкиот авион се урна во областа Меганинагар, предизвикувајќи паника и хаос на земјата.
Патничкиот авион Боинг 787-8 падна врз хостел за лекари. Авионот се урна во зграда која е хостел за лекари, потврди портпаролот на полицијата Џаипал Синг Раторе. Зградата е студентски дом на медицинскиот колеџ, во кој се сместени студенти и млади лекари. Спасувачките служби ги пребаруваат урнатините.
Според официјалните информации во авионот имало 232 патници и 12 членови на екипажот. Авионот од Ахмедабад летал за Лондон. И полицијата потврди дека во авионот имало 244 лица.
Густи облаци од чад се издигаа од местото на несреќата и се видливи од голема далечина.
Службите за итни случаи, вклучувајќи ги и пожарникарите, веднаш биле испратени на местото на катастрофата и во тек е операција за спасување.
Состојбата на патниците и екипажот во моментов е непозната. Несреќата се случила кратко по полетувањето на авионот, под засега нејазни околности. Во тек е операција за пребарување и спасување за пронаоѓање и евакуирање на ебентуално преживеани.
Ер Индија потврди дека нивниот лет 171 од западниот град Ахмедабад до Лондон Гетвик се урна во „трагична несреќа“.
„Со длабока тага потврдувам дека летот 171 на Ер Индија, од Ахмедабад до Лондон Гетвик, денеска имаше трагична несреќа“, изјави претседателот на Ер Индија, Натараџан Чандрасекаран.
Извор: 24vesti.mk
