Претседателот на Сојузот на синдикати на Македонија (ССМ), Слободан Трендафилов, денеска објави дека синдикалната минимална кошничка за јануари 2025 година изнесува 63.252 денари, што е зголемување од 391 денар во однос на декември 2024 година. На прес-конференцијата, тој нагласи дека само делот за храна и пијалоци од кошничката бележи раст од 123 денари за 63-те основни производи.
Трендафилов оцени дека реалната инфлација во Македонија е над 10%, значително повисока од официјалната стапка од 3,5%. Според него, цените на производите фиктивно се намалуваат, додека трговците се богатат на сметка на граѓаните.
– „Трговците се алчни и го користат секој момент за дополнително збогатување. Она што сега го ветуваат, дека ќе ги задржат цените на основните производи, е само мамка за да избегнат намалување на цените кои веќе паѓаат на светските берзи. На пример, цената на житните култури минатата година е намалена за 13,6%, а кај нас лебот поевтини само за еден денар – од 33 на 32 денари. Нема никакви намалувања кај брашното, тестенините, зејтинот, млекото и другите основни производи,“ истакна Трендафилов.
Претседателот на ССМ го критикуваше и ефектот од мерката „Новогодишна кошничка“, оценувајќи дека немало вистинско намалување на цените на околу 1.000 производи.
– „Во следниот период ССМ ќе преземе поостри мерки за да ги информира граѓаните што е добро, а што е лошо. Трговците се лош пример за македонската економија, ако знаеме дека минатата година имаа рекордни добивки и профити. Ќе ги објавиме сите завршни сметки на големите синџири маркети и ќе ги презентираме на јавноста,“ порача Трендафилов.
ССМ најавува дека ќе продолжи со притисокот врз трговците и ќе бара поголема транспарентност и намалување на цените, особено во услови кога македонските граѓани се соочуваат со висок трошок на живот.
ИЗВОР: racin.mk
