АНКАРА (АА) – Јеменската група Хуси денес соопшти дека извршила ракетен напад врз аеродромот „Бен Гурион“ во централниот дел на Израел, како и врз американски носач на авиони во Црвеното Море, јавува Анадолу.
Портпаролот на Хусите, Јахја Сари, изјави дека групата лансирала хиперсонична балистичка ракета кон аеродромот, при што директно ја погодила целта.
Израелската армија го потврди нападот, но соопшти дека проектилот бил пресретнат надвор од израелскиот воздушен простор.
Нема информации за повредени.
Во военото соопштение се наведува дека биле активирани сирени поради страв од паѓање на остатоци од ракетата.
Сари, исто така, изјави дека силите на Хусите таргетирале американски воени бродови, вклучително и носачот на авиони „УСС Хари Труман“ со повеќе ракети и беспилотни летала.
Од САД сè уште нема официјален коментар за овие тврдења.
Деветмина Јеменци се повредени во американските воздушни напади во Јемен вчера, според властите на Хусите.
Според дописникот на Анадолу, од саботата досега САД извршиле над 60 воздушни напади врз Јемен, при што се убиени повеќе од 50 лица, а десетици биле повредени.
Од крајот на 2023 година Хусите напаѓаат бродови поврзани со Израел што минуваат низ Црвеното и Арапското Море, теснецот Баб ал-Мандеб и Аденскиот Залив со ракети и беспилотни летала, тврдејќи дека тоа го прават како знак на солидарност со Газа.
Групата ги прекина нападите кога беше прогласен прекин на огнот во Газа во јануари меѓу Израел и палестинската група Хамас, но повторно ги обнови кога Израел воведе ограничувања за хуманитарната помош за Газа претходно овој месец.
Извор: Anadolu Agency (AA)
