АДЕН (АА) – Хусите во Јемен поддржани од Иран објавија дека од 15 март во американските напади врз Јемен се убиени 61 цивил, а 139 се повредени, известува Анадолу.
Министерството за здравство поврзано со Хусите даде изјава во врска со американските напади врз Јемен.
Во соопштението се вели: „Шеесет и еден цивил загинаа, а 139 лица се повредени во американските напади врз Јемен од 15 март досега.“
Во соопштението се додава дека до 1 април 2025 година животот го загубиле 250 луѓе, а 714 биле повредени во нападите врз Јемен од датумот кога Хусите ги започнаа нападите на Црвеното Море, со цел да ја поддржат Газа, која е под израелски напади.
Од друга страна, пак, не се наведуваат информации за воените загуби на Хусите во нападите.
Како одговор на израелските напади врз Газа, Хусите во Јемен, поддржани од Иран, на 31 октомври 2023 година почнаа да запленуваат комерцијални бродови во близина на брегот на Јемен за кои рекоа дека им припаѓале на израелски компании, а некои од нив ги нападнаа со беспилотни летала и проектили.
На 18 декември 2023 година Соединетите Американски Држави објавија дека е формирана мултинационална „поморска работна група“ наречена „Операција за просперитет Гардијан“ против силите на Хусите со учество на група земји, посочувајќи дека е загрозена безбедноста на глобалната поморска трговија.
Американскиот претседател Доналд Трамп на 15 март на платформата Трут Социал објави дека ѝ наредил на војската да изврши „масовен напад“ против Хусите во Јемен.
Лидерот на Хусите, Абдул-Малик ал-Хуси, рече дека американските авиони и воени бродови ќе бидат цел на Хусите сѐ додека продолжуваат со напади, а во опструкциите на морската пловидба ќе биде опфатен и Вашингтон.
Извор: Anadolu Agency (AA)
