Уште пред стартот на Мундијалот во Хрватска, Данска и Норвешка ни беше јасно дека натпреварот против Гвинеја ќе биде најважниот за нас, но ретко кој очекуваше дека во овој натпревар ќе влеземе со еден бод.
Нашите ракометари како ретко досега во последните години покажаа голема пожртвуваност и борба на ракометниот терен за време на еден голем собир. Македонија, водена од двоецот на Еурофарм Пелистер – Митревски и Кузмановски, приреди изненадување на стартот од групната фаза и ремизираше со Унгарија, а во второто коло против Холандија загуби со 37-32 во натпревар со многу контроверзни одлуки на судиската двојка од Данска.
Поразот од „лалињата“ не смее да ја наруши атмосферата во нашата соблекувална, затоа што избраниците на Лазаров и на овој натпревар покажаа карактер, квалитет и борба и беа вистински пример како треба да се бранат боите на националниот дрес.
Гвинеја, според очекувањата, досега забележа два порази, со 40 постигнати гола и дури 75 примени. И Унгарија и Холандија извојуваа двоцифрени победи над африканската селекција, а така треба да биде и вечерва, доколку Македонија одново го покаже најдоброто од себе во Вараждин. Нема да биде изненадување доколку Лазаров направи и неколку измени во својот состав и шанса да добијат младите Галевски, Петковски и Карасманакис.
Со евентуален триумф над Гвинеја ќе бидеме дел од група во која ќе учествуваат уште Франција, Австрија и Катар.
Извор: kurir.mk
