Илјадници демонстранти кои протестираа против одлуката на грузиската Влада да ги прекине преговорите за пристапување на земјата со ЕУ се собраа синоќа пред парламентот во главниот град Тбилиси втора ноќ по ред, опкружени со полициски сили.
Претходната ноќ, полицијата употреби водени топови, бибер спреј и солзавец за да ги растера демонстрантите кои излегоа на улиците откако премиерот Иракли Кобахиџе од владејачката партија Грузиски сон најави прекин на преговорите.
Министерството за внатрешни работи на Грусија соопшти дека на протестот се приведени 43 лица.
Демонстрантите вечерва повторно дојдоа пред Собранието, дел од нив удираа по металните капии од зградата. Полицијата за разбирање демонстрации беше распоредена во голем број за да ја заштити зградата, а во близина можеше да се забележи паркиран и воден топ, кој според снимки објавени на социјалните мрежи бил и употребен.
Грузија е во политички превирања од парламентарните избори на 26 октомври, на кои Грузиски сон обезбеди 54 отсто од гласовите, а членовите на опозицијата и западните влади тврдат дека гласањето било нарушено со кршење на законот и руско влијание. Изборите се сметаа за референдум за аспирациите за членство на земјата во ЕУ, а резултатите поттикнаа големи демонстрации и доведоа до бојкот на опозицијата на парламентот.
Опозицијата тврди дека гласањето било наместено под влијание на Русија, која се обидува да ја задржи Грузија под свое влијание.
Грузиската претседателка Саломе Зурабишвили, остра критичарка на владејачката партија Грузиски сон, се приклучи на протестот во Тбилиси вчера во знак на солидарност со демонстрантите. Претходно вчера таа и се обрати на нацијата и ја обвини владата дека му објави „војна“ на сопствениот народ.
Грузиската претседателка, која главно има церемонијална улога, рече дека владејачката партија ги наместила изборите со помош на Русија.
Објавата на Владата дека ги суспендира преговорите за пристап во ЕУ до 2028 година и дека нема да прифати финансирање од Брисел дојде неколку часа откако Европскиот парламент ја усвои резолуцијата со која го осудува гласањето минатиот месец, велејќи дека тоа не било ниту слободно, ниту фер и претставува натамошно демократско назадување на земјата за што „целосно е одговорна партијата Грузиски сон“.
Грузија доби статус на кандидат за ЕУ во декември 2023 година, но односите со Брисел се влошија во последниве месеци, почнувајќи со усвојувањето на контроверзниот закон за „странски агенти“, кој критичарите велат дека се заканува јавно да дискредитира илјадници медиуми и граѓански организации.
ЕУ ја суспендираше апликацијата за членство на Грузија на неодредено време во јуни, кога парламентот усвои закон со кој се бара од организациите кои добиваат повеќе од 20 отсто од нивното финансирање од странство да се регистрираат како „да следат интереси на странска сила“, слично на рускиот закон што се користи за дискредитирање на организации кои ја критикуваат владата.
САД во јули соопштија дека ќе суспендираат повеќе од 95 милиони долари помош за грузиската влада, предупредувајќи дека таа назадува во демократијата.
Извор: 24vesti.mk
