Претседателот на комората на сметководители, Благоја Грозданов во Аргумент плус рече дека одземањето на лиценците за работа на сметководителите ќе донесе голема штета и на буџетот и на стопанството па затоа објасни дека е потребно итно продолжување на рокот за поднесување на завршни сметки. Според него, потребни се долгорочни системски промени. Тој рече и дека од Министерството за финансии им ветиле решавање на проблемот.
„Јасно ни е со какви проблеми се соочуваат колегите бидејќи се направи хаоас со одземање на лиценците и тоа е лошо. Разбирлив е револтот кој го имаат, 4000 сметководители изгубија право да потпишуваат завршни сметки. Од Министерството за финансии рекоа дека работат на проблемите и ќе се реши проблемот, свесни сме за законската процедура но веќе времето гази, апелираме да се најде решение“, изјави Грозданов.
Тој објасни дека покрај измените во Законот потребни се и подолгорочни решенија.
„Краткоточно да се продолжи рокот за поднесување на завршните сметки, недела до две. Друго она на долг рок што се залагаме е либерализација за можноста на професионално здужување, ова е стратешка цел и свесен сум за големината на проектот. Со еден Институт не се функционира. Да се организираме во коморни здруженија и да имаме избор каде би членувале, односно таму каде што ќе бидат застапени нашите интереси“, рече Грозданов.
За процесот на дигитализација Грозданов објасни дека државата се движи во права насока но со мали чекори.
„Дигитализацијата ни е потребна бидејќи се давиме во хартија. Преземаме чекори во добра насока но се движиме со споро темпо и потребни се похрабри чекори, пред да ги преземеме треба да се смисли како да се движиме, а не да нафрламе само нови системи“, додаде Грозданов.
Извор: 24vesti.mk
