При вонреден инспекциски надзор кај улицата Јустинијан, во близина на Драчево, инспекторите на Град Скопје затекнаа камиони како истураат огромни количини отпад на приватен имот, создавајќи дива депонија од 5.000 квадратни метри. Локацијата се наоѓа на границата меѓу Општина Кисела Вода и Општина Студеничани.
Во моментот на контролата, фирмата ГО-ИВА Бетон била затекната како со тешки товарни возила нелегално фрла отпад, што е спротивно на Законот за управување со отпад и Законот за заштита на животната средина. По неколкудневно следење, сторителите биле фатени на лице место.
-Инспекторатот на Град Скопје продолжува со засилени контроли 24/7 со цел намалување на загадувањето и зачувување на животната средина. За сите прекршители се изрекуваат неселективни казни, а континуирано се поднесуваат и кривични пријави за нелегално исфрлање и согорување опасен отпад, вклучувајќи азбест, канцерогени материјали и градежен шут.
Иако на територијата на Скопје постојат вкупно 14 институции со надлежност да реагираат во случаи на еколошки прекршоци, засега само Град Скопје презема конкретни мерки, додека останатите не постапуваат, иако имаат законска обврска, велат од Град Скопје.
ИЗВОР: racin.mk
