Градоначалничката на Град Скопје, Данела Арсовска денеска во средното училиште на Град Скопје „Михајло Пупин“ ја отвори манифестацијата „Денови на електротехника“, манифестација која се одржува со цел да се промовира електротехничката струка и средното стручно образование. Во следните неколку денови во училиштето се организира натпревар на ученици од 22 средни училишта по предметот физика, не само од Град Скопје, туку и од останатите градови од Македонија.
– Средното стручно образование е иднината и навистина сум горда што имаме 23 скопски средни училишта кои продуцираат кадри, кои навистина се квалитетни, добри, професионални и од она што понатаму гледаме од нивниот кариерен развој дека се успешни. Затоа би сакала, да ги охрабрам учениците, кои се нашата иднина, како и наставниот кадар, професорите, директорите, кои се залагаат нашите деца да бидат што е можно подобри да продолжат со добрата работа. Воедно ги охрабрувам и општествено одговорните компании се повеќе да инвестираат во учениците и училиштата, затоа што така инвестираат во сопствените кадри, но исто така и во иднината на Македонија, затоа што младите се нашата иднина – истакна Арсовска.
Вкупно 66 ученици од 22 училишта се натпреваруваат на тема електротехника по предметот физика.
“Деновите на електротехника“ траат од 2 до 6 мај, а финалето на натпреварот по физика ќе се одржи во најсовремена лабораторија по електротехника со професионална опрема.
ИЗВОР: skopje.gov.mk
