Градоначалникот на општина Кисела Вода и претседател на ЗЕЛС, Орце Ѓорѓиевски, денес присуствуваше на конференција посветена на одржливото урбано мобилно планирање, на покана на министерот за транспорт, Александар Николовски.
Ѓорѓиевски истакна дека ваквите настани се одлична можност за размена на искуства и примена на добри практики од европските градови и регионот. Тој се заблагодари на Министерството за транспорт и Светска банка за поддршката преку проектот за поврзување на локални патишта, кој овозможува развивање на планови за одржлива урбана мобилност.
„Тоа значи подобра транспортна мрежа, поголема безбедност за сите учесници во сообраќајот и повеќе простор за пешаци, велосипедисти и зелени зони“, истакна Ѓорѓиевски.
Тој додаде дека со заеднички ангажман на општините, Владата и меѓународните партнери, ќе се изградат градови по мерка на човекот – почисти, поуредени и пофункционални. Ѓорѓиевски изрази уверување дека оваа конференција ќе прерасне во традиција и ќе поттикне нови успешни проекти кои ќе придонесат за подобар и поквалитетен живот за сите граѓани.
„Ова е патот по кој мора да одиме ако сакаме нашите деца да живеат во поздрава и поубава средина“, заклучи Ѓорѓиевски.
