Градоначалникот на Скопје, Орце Ѓорѓиевски, денес оствари конструктивна средба со заменик-претседателот на Владата и министер за транспорт, Александар Николоски, во просториите на Градот. На средбата беа разгледани заедничките проекти кои ќе донесат директни бенефити за жителите на главниот град.
Главните теми на разговор беа подобрувањето на транспортниот систем преку реализација на проектот Градски воз, набавка на нови еколошки автобуси за јавниот превоз и модернизација на инфраструктурата во Скопје. Министерот Николоски ја истакна заложбата на Владата за реализирање капитални инвестиции како темел за идниот развој на градот.
Ѓорѓиевски и Николоски заклучија дека Скопје има потреба од нов план за трансформација на градскиот сообраќаен систем, кој ќе донесе поголема ефикасност, економичност и подобар квалитет на живот за граѓаните. По започнувањето на изградбата на првата од трите линии на Градскиот воз, следниот приоритет ќе биде подготовката на останатите две линии кон Ѓорче Петров и Миладиновци.
Градот веќе е во комуникација со Владата за набавка на нови еколошки автобуси кои ќе го подигнат нивото на јавниот превоз. Ѓорѓиевски ја изрази благодарноста до премиерот Христијан Мицковски, министерот Николоски и целата Влада за постојаната поддршка и визија.
„Скопје ќе го развиваме заедно, со работа, посветеност и јасна цел – модерен и функционален град за сите граѓани“, истакна градоначалникот.
