Германскиот режисер Вернер Херцог ќе добие Златен лав за животно дело на 82. Венецискиот филмски фестивал, соопштија организаторите на Фестивалот. Херцог изјави дека е „длабоко почестен“ од признанието.
„Отсекогаш се трудев да бидам добар војник на филмската уметност, и оваа награда ја чувствувам како орден за мојата работа. Ви благодарам“, изјави режисерот.
Директорот на Фестивалот, Алберто Барбера, рече дека Херцог е иноватор на Новиот германски филм, како автор на филмовите „Знаци на животот“, „Вампирот Носферату “, „Агире, Бог на гневот“, „Фицкаралдо“, „Лошиот поручник: Станица Њу орлеанс“, „Човекот Гризли“. Барбера го нарече Херцог „брилијантен раскажувач на необични приказни и последен наследник на големата традиција на германскиот романтизам“.
82-годишниот Херцог има добиено бројни награди. Вели дека го снима својот следен долгометражен филм „Бакинг Фастард“ во Ирска, работи на развој на анимиран филм заснован на неговиот роман „Светот на самракот“ и го позајмува гласот за суштество во претстојниот анимиран филм на Бонг Јон-хо. Неодамна во Африка заврши со снимањето на документарниот филм „Слонови духови “.
„Сè уште не сум готов“, рече Херцог.
Венецискиот филмски фестивал ќе се одржи од 27 август до 6 септември.
ИЗВОР: sdk.mk
