Медиумите наведуваат дека една од жените е новинарка и дека нејзините симптоми можеби се појавиле пред конференцијата од 29 до 30 април. Таа отишла во болницата „Шарит“ во Берлин
Германската полиција го истражува можното труење на две руски емигрантки кои присуствувале на конференција во Берлин на крајот на април, организирана од критичарот на Кремљ, Михаил Ходорковски, пишува „Гардијан“.
Берлинската полиција изјави за Ројтерс дека е отворена истрага откако германскиот весник „Велт ам зонтаг“, повикувајќи се на руската истражувачка медиумска група „Агентство“, објави дека две жени пријавиле симптоми кои укажуваат на можно труење.
Полицијата не соопшти повеќе детали повикувајќи се на истрагата која е во тек.
Медиумите наведуваат дека една од жените е новинарка и дека нејзините симптоми можеби се појавиле пред конференцијата од 29 до 30 април. Таа отишла во болницата „Шарит“ во Берлин.
Втората жена е Наталија Арно, директорка на невладината организација „Фондација слободна Русија“. Таа на својата фејсбук-страница напиша дека открила дека вратата од нејзината хотелска соба била оставена подотворена.
„Се разбудив во 5 часот наутро, со остри болки и чудни симптоми“,
напишала Арно.
Во последниве години беа извршени неколку напади со труење во странство и во Русија против противниците на Кремљ. Рускиот опозициски лидер Алексеј Навални се лекуваше во Русија, а подоцна и во Германија поради, како што покажаа западните лабораториски тестови, обидот за труење со нервен агенс во Сибир во 2020 година.
Владата во Москва ги отфрли обвинувањата.
Навални доброволно се врати во Русија во 2021 година од Германија. Тој беше уапсен во јануари истата година и оттогаш е во затвор.
Извор: 360stepeni.mk
