Германија нема да испраќа борбени авиони во Украина, вели Шолц

Изјавата на германскиот канцелар следува откако тој минатата недела се согласи да испрати 14 тенка „леопард 2“ во Украина, по што официјален Киев ги засили повиците до Западот за испраќање борбени авиони во земјата

И покрај засилените повици од официјален Киев до западните земји за испраќање борбени авиони и оружје во земјата, со цел подобро справување со руската инвазија, германскиот канцелар Олаф Шолц уште еднаш повтори оти Германија нема да испраќа борбени авиони во Украина.

Во интервју за германскиот весник „Тагесшпигел“, прашан околу барањата на Украина, Шолц кажа оти прашањето за испраќање борбени авиони воопшто не се поставува и додаде дека Германија не треба да влегува „во постојана тендерска војна со системското оружје“.

Ако по штотуку донесена одлука (за испраќање на тенковите), во Германија започне нова дебата за нешто друго – авиони, тоа е несериозно и ја разнишува довербата на граѓаните во одлуките кои ги носи владата. Вакви дебати не треба да се водат поради домашно политичко профилирање“,

рече Шолц и кажа оти сега е важно сите оние кои изразиле намера да испратат борбени тенкови во Украина да го сторат тоа.

Во таа насока, Шолц во интервјуто предупреди да не се зголемува „ризикот од ескалација“, нагласувајќи оти Москва веќе остро ги осудила најавите за испраќање на борбени тенкови во Украина.

„Нема војна меѓу НАТО и Русија. Нема да дозволиме таква ескалација“,

рече тој.

Изјавата на германскиот канцелар следува откако тој минатата недела се согласи да испрати 14 тенка „леопард 2“ во Украина, со што им дозволи и на Полска, Шпанија и Норвешка да испратат тенкови на Украина, по нивните претходни најави оти се подготвени да го сторат тоа.

Одлуката на Шолц да ги испрати тенковите беше придружена со најава на САД дека ќе испрати 31 тенк „абрамс“.

Украинскиот претседател Володимир Зеленски им се заблагодари на Берлин и Вашингтон за потегот, во веднаш потоа нагласи дека на Украина ѝ е потребно повеќе тешко оружје за да се одбрани од руските трупи, вклучувајќи борбени авиони и ракети со долг дострел.