Борел денеска ги повика другите земји кои го вперуваа прстот во Германија, да ѝ се придружат во испраќањето тенкови во Украина
Додека НАТО сојузниците имаат тешкотии да ги соберат тенковите што ѝ ги ветија на Украина, Германија конечно објави конкретен период кога ќе испрати „половина баталјон“ од борбените тенкови „леопард 2“, што би значело околу 15 возила. Според најавите, Украинците ќе ги добијат тенковите крајот на март.
„Не успеавме да составиме баталјон, ќе биде половина баталјон. Германија ќе обезбеди 14 ’леопард 2 А6‘, а Португалија три. Сакам да појаснам дека нашите ќе бидат испорачани во последната недела од март. Тој е сигурно“,
рече денеска германскиот министер за одбрана, Борис Писториус по состанокот во Брисел.
Полска, пак, се обврзна дека ќе испрати цел баталјон тенкови „леопард 2“, но од постар модел. Меѓутоа, претседателот Анджеј Дуда кој допатува во Брисел за да се сретне со генералниот секретар на НАТО, Јенс Столтенберг, не кажа кога ќе успеат да ги доопремат сите тенкови.
Норвешка вчера најави дека ќе испрати осум тенкови од овој тип, но ни таа не кажа кога ќе го направи тоа.
Шефот на европската дипломатија, Жозеп Борел, денеска ги повика државите да ѝ се придружат на Германија во испраќањето тенкови на Украина откако беше објавена вест дека Данска и Холандија се откажале од испораката.
„Државите мора да испорачаат колку што може тенкови, што е можно побрзо. Ќе биде разочарувачки, бидејќи толку многу го вперуваа прстот во Германија, сега тие да не испратат тенкови“,
рече Борел во интервју за германската телевизија „Феникс“.
Тенковите „леопард“ кои се германско производство, ги има во повеќе од 10 војски во земјите членки на НАТО. Украина, според ветувањата кои ги доби, треба во наредните месеци да добие најмалку 100 „леопард 1“ – постар, но обновен модел.
Извор: 360stepeni.mk
