Член на германската коалициска влада, Христијанско-социјалната унија (ЦСУ), чија одговорност е Министерството за внатрешни работи, сака дополнително да ја заостри миграциската политика во 2026 година, вклучително и зголеменото враќање на бегалците во Сирија и Авганистан.
Намалувањето на нерегуларната имиграција и зголемувањето на бројот на депортации е еден од приоритетите на коалициската влада на канцеларот Фридрих Мерц, која ја презеде власта во мај.
„Во 2026 година, мора да започнеме офанзива на депортации со редовни летови до Сирија и Авганистан“, се вели во документот подготвен од претставничкиот клуб на ЦСУ за претстојниот партиски конгрес.
Во него се наведува дека од крајот на граѓанската војна во Сирија, „веќе нема причина“ стотици илјади сириски бегалци кои „ѝ се потребни на нивната татковина“ да останат во Германија.
ЦСУ истакнува дека има се повеќе луѓе кои „одат на одмор“ во Сирија, и бара итно откажување на дозволата за престој на овие лица во Германија. Исто така се залага за органичувања за бегалците од Украина и граѓаните на ЕУ кои доаѓаат во Германија за социјални бенефиции.
Извор: tv21
