БЕРЛИН (АА) – Германскиот канцелар Олаф Шолц и украинскиот претседател Владимир Зеленски побараа продолжување на Договорот за жито за време на телефонскиот разговор, изјави денес владиниот портпарол Штефен Хебестрајт, јавува Анадолу.
„Канцеларот Шолц и претседателот Зеленски повикаа Договорот за жито под покровителство на Обединетите нации да се продолжи по 17 јули, што помага да се подобри глобалната ситуација со храната“, додаде Хебестрејт.
Минатиот месец генералниот секретар на Обединетите нации, Антонио Гутереш, изрази загриженост дека Русија на 17 јули ќе се откаже од Договорот што овозможува безбеден воен извоз на жито и ѓубрива од три украински пристаништа на Црно Море.
Тој ги даде овие изјави откако рускиот претседател Владимир Путин на 13 јуни рече дека Москва неколкупати се согласила да ја продолжи Иницијативата за црноморско жито, но сега размислува за повлекување.
Москва го поврза продолжувањето на Договорот со вклучувањето на нејзината државна Руска земјоделска банка во меѓународниот платен систем СВИФТ. Исто така, се пожали дека Договорот не го исполнил ветувањето за ослободување на рускиот земјоделски извоз спречен од западните санкции.
Туркије, Обединетите нации, Русија и Украина во јули минатата година во Истанбул потпишаа Договор за продолжување на извозот на жито од три украински пристаништа преку Црното Море, кој беше запрен по почетокот на војната во Украина во февруари минатата година.
Оттогаш Договорот беше неколкупати обновен, а на 18 мај беше продолжен за уште два месеца.
Во меѓувреме, канцеларот ја потврди „постојаната и непоколеблива солидарност на Германија со Украина“ во војната со Русија.
Шолц рече дека Берлин „ќе продолжи да ја поддржува Украина, вклучително и на воено поле, во тесна координација со европските и меѓународните партнери“.
„Двете страни се согласија да продолжат со својата конструктивна размена со цел да се добие глобална поддршка за мирно решение и да останат во близок контакт“, истакна портпаролот Хебестрејт.
Извор: www.aa.com.tr
