Генералното собрание на Обединетите нации со огромно мнозинство усвои декларација која предвидува „конкретни, временски ограничени и неповратни чекори“ кон дводржавно решение меѓу Израел и Палестина, пред состанокот на светските лидери кон крајот на септември.
Декларацијата, која има седум страници, е резултат на меѓународна конференција одржана во јули во ОН под покровителство на Саудиска Арабија и Франција, на која Соединетите Американски Држави и Израел одбија да присуствуваат.
Резолуцијата со која се поддржува декларацијата доби 142 гласа „за“, 10 „против“, додека 12 земји беа воздржани. Гласањето се одржа неколку недели пред заседанието на Генералното собрание на 22 септември, на чии маргини се очекува Велика Британија и другите западни држави официјално да ја признаат палестинската држава.
Усвоениот документ ги осудува нападите на палестинскиот Хамас врз Израел на 7 октомври 2023 година, кои ги предизвикаа нападите врз Газа, но и израелските напади врз цивили и цивилната инфраструктура, како и опсадата и изгладнувањето, „кои доведоа до разорна хуманитарна катастрофа“.
Францускиот министер за надворешни работи Жан-Ноел Баро изјави дека резолуцијата обезбедила меѓународна изолација на Хамас. „За прв пат ОН усвоија текст со кој се осудуваат нивните злосторства и се повикува на предавање и разоружување“, напиша тој на социјалната мрежа X.
Резолуцијата доби поддршка од сите арапски држави од Заливот. Против, освен Израел и САД, гласаа и Аргентина, Унгарија, Микронезија, Науру, Палау, Папуа Нова Гвинеја, Парагвај и Тонга.
Декларацијата исто така нагласува дека војната во Газа „мора веднаш да престане“ и поддржува распоредување на привремена меѓународна мисија за стабилизација под мандат на Советот за безбедност на ОН, со цел заштита на населението и зајакнување на капацитетите на идната палестинска држава.
Американските дипломати го опишаа усвојувањето на резолуцијата како „уште еден погрешен и ненавремен потег за публицитет“ кој, како што тврдат, ги поткопува сериозните дипломатски напори за ставање крај на конфликтот. „Нема сомнеж, оваа резолуција е подарок за Хамас“, рече американската дипломатка Морган Ортагус во обраќањето до Генералното собрание, додавајќи дека конференцијата „ја продолжи војната, го охрабри Хамас и ги загрози изгледите за мир“.
Израел, исто така, ја отфрли декларацијата, оценувајќи ја како еднострана и нарекувајќи го гласањето „сцена на политички театар“, пренесува Ројтерс.
Извор: tv21
