СКОПЈЕ (АА) – Премиерот на Северна Македонија, Димитар Ковачевски, го пречека генералниот секретар на НАТО, Јенс Столтенберг, кој престојува во официјална дводневна посета во Скопје, јавува Анадолу.
Ова е прва посета на Столтенберг во Северна Македонија откако државата е полноправна членка на НАТО.
Според агендата за официјалната посета на генералниот секретар на НАТО, Столтенберг, веднаш по церемонијата за пречек се одржува тет-а-тет средба со премиерот Ковачевски, по што следува билатерална средба на двете делегации.
Исто така, Ковачевски и Столтенберг ќе одржат заедничка прес-конференција.
Во текот на денешниот ден, Столтенберг ќе одржи говор пред пратениците во македонското Собрание, а ќе се сретне и со претседателот на Северна Македонија, Стево Пендаровски.
Во текот на утрешниот ден, Северна Македонија ќе биде домаќин на неформалниот состанок на лидерите на НАТО-сојузниците од регионот. Генералниот секретар на НАТО, Јенс Столтенберг, и премиерот на Северна Македонија, Димитар Ковачевски, ќе ги пречекаат поканетите лидери од Албанија, Хрватска и Црна Гора.
Генералниот секретар на НАТО, Јенс Столтенберг, е во четиридневна балканска турнеја од 19 до 22 ноември, во која ги посети Босна и Херцеговина, Косово, Србија и Северна Македонија.
