Францускиот претседател изрази поддршка за забраната за носење марами на спортски натпревари

ИСТАНБУЛ (АА) – Францускиот претседател Емануел Макрон изрази поддршка за забраната за носење марами на спортски натпревари, пренесува Анадолу.

„Стојам зад Олимписката повелба, која забранува носење на сите верски симболи за време на натпревари“, изјави Макрон во интервју за француската телевизија TF1.

Тој направи разлика меѓу практикување спорт во спортски сали и учество во официјални натпревари, нагласувајќи дека одлуката дали да се дозволат марами им припаѓа на самите спортски федерации.

„Кога сте на натпревар, тоа не е место за верски симбол“, рече тој, повикувајќи на „прагматизам“, бидејќи францускиот закон не го забранува тоа.

Макрон исто така одговори на прашања за можноста за одржување референдуми по различни прашања, како имиграција, пензиски реформи, евтаназија и јавни финансии.

Тој ја поддржа идејата за организирање неколку референдуми во наредните месеци.

„Целта е да ги консултираме нашите граѓани за крупни економски или социјални реформи. До јуни, Владата ќе предложи неколку реформи, а потоа ќе видам за кои ќе може да се одржи референдум“, изјави Макрон.

Иако ја отфрли можноста за референдум за поништување на пензиската реформа со која се зголеми старосната граница за пензионирање на 64 години и не смета дека референдум за имиграција би бил „ефикасен“, Макрон не ја исклучи можноста за референдум за асистирана смрт „во случај на безизлезна ситуација“, како и за прашања поврзани со јавните финансии.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.