АНКАРА (АА) – Француски војник е убиен во антитерористичка операција во Ирак, објави француското Претседателство, пренесува Анадолу.
Никола Мазје од падобранската единица е убиен во понеделникот во близина на ирачкиот главен град Багдад додека неговата единица им помагала на ирачките сили во антитерористичка операција, се вели во соопштението на француското Претседателство.
Во соопштението се вели дека претседателот Емануел Макрон изразува тага и упатува сочувство до семејството на војникот.
Претседателот, исто така, ја поздравува храброста на војниците ангажирани во Ирак и ја потврдува решителноста на Франција во борбата против тероризмот на страната на Ирак, се додава во соопштението.
Францускиот Генералштаб во вторникот соопшти дека за време на операцијата во близина на Багдад биле ранети уште четворица војници, кои веднаш биле префрлени во болница.
Франција ја започна операцијата „Шамал“ на 19 септември 2014 година во обид да се спротивстави на ширењето на терористичката организација ДАЕШ и да ја поддржи ирачката Армија и коалицијата.
