МАРСЕЈ (АА) – Во уривањето на петкатна станбена зграда во францускиот град Марсеј ова утро повредени се неколку лица, а пожарот што избувна од експлозијата ги попречува спасувачките операции, пренесува Анадолу.
Засега не е познат точниот број на настраданите, а одделни локални медиуми пренесуваат дека смртно настрадале најмалку 5 лица.
„Се обидуваме да го изгаснеме огнот, а истовремено да ги заштитиме животите на лицата кои можеби се наоѓаат под урнатините“, рече Лионел Матје, командант на противпожарната бригада на Марсеј.
Големиот оган го оневозможува испраќањето на тимовите со кучиња за потрага.
Повеќе од 100 пожарникари се обидуваат да го изгаснат пожарот под огромните урнатини. Акцијата за спасување тече бавно и деликатно, а цел е да се заштитат пожарникарите и лицата кои потенцијално се заробени.
„Пожарникарите од минута во минута прават процена на најдобриот начин за гаснење на пожарот“, рече градоначалникот на Марсеј, Беноа Пајан.
Пајан изјави дека две соседни згради се делумно урнати и дека една од нив е во опасност и таа да се урне, што претставува двоен предизвик. „Станарите се евакуирани, од кои шестмина се хоспитализирани“, информираше Пајан.
Урнатата зграда се наоѓаше во стар кварт во центарот на Марсеј, втор по големина град во Франција. Бучавата од експлозијата одекна и во другите населби. Блокирани се околните улици.
Градоначалникот Пајан изјави дека експлозијата е „веројатно“ причината за уривањето на зградата, но нагласи дека истрагата на крајот ќе ги утврди околностите.
Извор: www.aa.com.tr
