АНКАРА (АА) – Француската полиција приведе 157 лица во текот на ноќта на протестите низ земјата кои избувнаа поради убиството на 17-годишниот тинејџер од страна на полицијата минатата недела, објавија денес локалните медиуми, пренесува Анадолу.
Франција: Во Лион полицијата со солзавец растера екстремно десничарска група
Протестите траат низ Франција од 27 јуни, кога полицаец го застрела Нахел М. за време на сообраќајна контрола во париското предградие Нантер, откако тој ги игнорирал наредбите да запре.
Протестите, што започнаа во Нантер, следната вечер се проширија и во други градови, меѓу кои се и Лион, Тулуз, Лил и Марсеј.
Тензиите се зголемија по судирите меѓу полицијата и демонстрантите.
Полицијата уапси стотици лица од избувнувањето на насилните протести, вклучително и 157 лица во шестата ноќ на немири, објави дневниот весник „Фигаро“.
Повеќе од 350 пожари се подметнати на јавни патишта и опожарени се 297 возила, се додава во извештајот.
Градоначалниците во Франција повикаа на собир денес пред сите градски сали низ земјата за да искажат поддршка на Општината Ле Хеј-ле-Роуз, каде што резиденцијата на градоначалникот Винсент Жанбрун беше цел со запалено возило во саботата вечерта.
Претседателот Емануел Макрон денес ќе биде домаќин на претседателите на Сенатот и Националното собрание за да разговараат за најновата ситуација, а утре ќе се сретне со градоначалниците на градовите каде што се случија акти на насилство.
Министерот за внатрешни работи Жералд Дарманин денес на Твитер објави за смртта на 24-годишниот пожарникар кој загинал додека работел на гаснење на пожарот на паркинг во париското предградие Сен Дени.
Извор: www.aa.com.tr
